A sección do Social do Tribunal de Instancia de Vigo vén de condenar o Concello de Vigo a atender os requirimentos da Inspección de Traballo para poñer fin aos incumprimentos en materia de prevención de riscos laborais no Servizo de Prevención, Extinción de Incendios e Salvamento (SPEIS). Na sentenza, contra a que cabe recurso diante do TSXG, constátanse as deficiencias do Plan de Prevención, que non se actualizou correctamente dende 2010.
A decisión xudicial, que chega tras a presentación dun conflito colectivo contra o Concello ao que se adheriu a CIG, obriga a Administración local a integrar a prevención de riscos laborais no seu sistema xeral de xestión, incluíndo todas as actividades e todos os seus niveis xerárquicos, mediante a implantación e aplicación dun plan de prevención de riscos laborais, tal e como lle fora requirido ao Concello pola propia autoridade laboral.
"Os incumprimentos continúan”, xa que a Administración local “non aporta documentación algunha que acredite a subsanación das deficiencias observadas”
Neste senso, sinálase que o actual plan de prevención é do año 2010, advertindo que dende entón producíronse cambios no número de membros do cadro de persoal do Concello e traslados ou modificacións nos centros de traballo.
Tamén se comprobou que a avaliación de riscos no SPEIS remóntase ao año 2018, e a planificación das actividades preventivas a 2019, cando nese período houbo variacións en distintos elementos a avaliar que afectaron, por exemplo, ao equipamento de traballo, ás instalacións ou ao número de efectivos. “O que evidencia o grave risco non só para as persoas traballadoras, senón tamén para o interese xeral, á vista da importante actividade desenvolvida polo servizo de bombeiros do Concello de Vigo”.
Mais a pesar dos requirimentos da Inspección de Traballo, a propia sentenza recolle que “os incumprimentos continúan”, xa que a Administración local “non aporta documentación algunha que acredite a subsanación das deficiencias observadas”.