Arquivan a causa xudicial contra catro sindicalistas ourensáns acusados de ameazas nas protestas do sector da limpeza

Un nutrido grupo de delegados/as da CIG, CCOO e UGT concentrouse ás portas dos Xulgados en solidariedade cos afectados
Vigo - 06 Out 2016
O xuízo previsto para hoxe contra catro representantes sindicais ourensáns acusados dun delito de ameazas durante as protestas en defensa do convenio colectivo do sector da limpeza quedou finalmente suspendido e arquiváronse as actuacións ao non comparecer a acusación (nin denunciantes nin Fiscalía). Un nutrido grupo de delegados/as da CIG, CCOO e UGT concentráronse ás portas dos Xulgados en solidariedade cos afectados.

Os feitos denunciados retrotráense ao pasado mes de marzo, cando no marco das múltiples mobilizacións das traballadoras/es da limpeza en defensa do seu convenio colectivo a Policía española procedeu a identificar a Anxo Pérez Carballo e Etelvino Blanco da CIG, Rogelio Cibeira da UGT e Antonio Pérez Jácome de CCOO.

Dende a Unión Comarcal da CIG de Ourense valoran positivamente a suspensión do xuízo e o arquivo da causa “por quedar demostrado con total contundencia (a falta de acusación é a proba máis palpábel) que non existiu delito na actuación das traballadoras/as da limpeza nin dos seus representantes sindicais”.

Neste senso, denuncian os reiterados intentos da Confederación de Empresarios da provincia e dos axentes da Policía española de criminalizar a acción sindical, “moi especialmente cando se trata de dirixentes ou membros da CIG”.

Ao mesmo tempo, trasládanlle o seu agradecemento á ampla representación de delegados/as dos tres sindicato que se concentrou ás portas dos Xulgados en solidariedade cos afectados.

Finalmente, lembran que o que realmente os levou a comparecer ante a Xustiza “é a defensa dun convenio xusto e digno para as traballadoras/es da limpeza de Ourense, polo que xa anunciamos que volveremos ás mobilizacións con máis forza e intensidade”.