A medra constante dos prezos está levando á ruína á clase traballadora galega. Á suba da electricidade, dos combustíbeis e de moitos produtos de primeira necesidade hai que engadir os elevados custos da vivenda, unha grave deterioración dos servizos públicos e retroceso nas políticas sociais.
Fronte ao lamento, a CIG chama a reaccionar e á mobilización para facer fronte a esta situación e que non sexamos de novo, as traballadoras e os traballadores, as e os que paguemos, máis unha vez, esta nova crise.
A CIG vén de lanzar unha campaña baixo o lema 'A suba dos prezos que a pague o capital. Queremos vivir dignamente'
Por iso, a central sindical vén de lanzar unha campaña baixo o lema 'A suba dos prezos que a pague o capital. Queremos vivir dignamente', que se desenvolverá nos próximos meses e anuncia a convocatoria de asembleas de delegadas e delegados para o día 8 de outubro e mobilizacións nas principais cidades o día 1 de decembro.
A CIG responsabiliza da suba descontrolada de prezos, agravada agora pola seca, ás guerras imperialistas e á ofensiva belicista dos EUA coa obediencia da UE e o entreguismo do Estado español. Unha inflación que está aumentando as débedas das familias e dificultando acceder a bens e servizos básicos.
Fronte a isto, o capital segue enriquecéndose e obtendo beneficios escandalosos. Unha situación diante da que os gobernos manifestan unha nula vontade para adoptar medidas contra o capital, que segue unha tendencia cada vez máis reaccionaria no social, no económico e no político.
Plan de Choque nos orzamentos de 2027
Diante desta situación a CIG reclama que a Xunta de Galiza e o goberno do Estado español inclúan, nos orzamentos de 2027, un Plan de Choque no que se articulen toda unha serie de medidas para frear a deterioración das condicións de vida:
- Paralizar o aumento do gasto militar e anular o que se ten aprobado para destinalo á protección social, servizos públicos e ter un sistema público galego digno de atención ás persoas.
- Intervención pública nos sectores estratéxicos, como o financeiro, enerxético, alimentación, vivenda e mobilidade para garantir uns mínimos de benestar social.
- Fixar nos 1.374,74 euros mensuais o SMI con carácter retroactivo desde o 1 de xullo de 2026 para cumprir xa a Carta Social Europea.
- Promover o dereito á negociación colectiva, o poder adquisitivo dos
salarios e as cláusulas revisión salarial conforme o IPC, garantindo a prevalencia dos convenios galegos fronte aos estatais.
- Os gobernos fixarán por lei prezos populares en produtos básicos de alimentación, prezos xustos para quen os produce e actuarán contra quen especula.
- Prohibir os desafiuzamentos, conxelar as cláusulas das rendas dos alugueiros e que non se apliquen as subas de xuros nas hipotecas.
- Aprobar un Plan de acción que poña a disposición inmediata todas as vivendas da SAREB para os sectores sociais máis necesitados. Intervir o mercado da vivenda fixando os prezos máximos de alugueiro acordes co salario medio do lugar. Creación dun Banco Galego de Vivenda para alugueiro social.
- Creación dunha Empresa Pública Galega de Electricidade, que garanta a enerxía ao servizo do pobo. Aprobación dunha Tarifa Eléctrica Galega, abaratando a factura da electricidade e reforma do marco legal para limpar da factura os cargos que non teñen relación directa co funcionamento do sistema eléctrico.
- Fixación polo Goberno dun prezo máximo da gasolina e do diésel tomando como base o prezo medio nas gasolineiras ao 24 de febreiro de 2022.
- Reforzar os servizos de mobilidade aumentando as frecuencias, ampliando os horarios para facilitar os desprazamentos, reducindo as exixencias para o acceso a maiores descontos e ampliar os traxectos gratuítos.