A suba do paro en agosto evidencia a precariedade e a estacionalidade do mercado laboral galego

O mes de agosto rematou con 1833 persoas paradas máis e con 2280 persoas afiliadas á Seguridade Social menos en Galiza, o que confirma a precariedade e a estacionalidade do mercado laboral. A perda de emprego rexistrada neste período en sectores como a educación ou en actividades profesionais administrativas evidencia ademais o fracaso do modelo ligado ao turismo, xa que o aumento da contratación en sectores como a hostalaría ou o comercio non compensou a perda que tivo lugar na educación e nas actividades administrativas.

Esta elevada estacionalidade do emprego imposibilita que amplas capas da clase traballadora teñan acceso a unhas condicións laborais “que lle garantan poder ter un futuro digno”, tal e como denuncia o secretario confederal de Negociación Colectiva, Emprego e Industria da CIG. Paco Sío tamén sinala que os datos amosan unha extensión da precariedade, xa que a afiliación á Seguridade Social cae nos sectores con mellores condicións como o educativo e medra nos que peores condicións teñen, como a hostalaría ou o comercio. 

“Vemos tamén como foi o mes no que menos contratos indefinidos se rexistraron, uns 15.000, mentres que os temporais aumentaron es todo o período estival, o que significa que se segue a abusar deste tipo de contratos con peores condicións e con baixos salarios”. Por outra banda, os indefinidos son maioritariamente a tempo parcial, “polo que a persoas traballadoras non teñen cubertas as súas necesidades económicas”.

En consecuencia, Sío insiste na necesidade de derrogar a reforma laboral de 2012 “para que o despedimento non sexa tan barato e non se poida xogar coa estabilidade da xente para responder ás necesidades das empresas”. E reitera o fracaso da reforma de 2021 “xa que se está a abusar da contratación indefinida parcializada que non permite unha vida digna”.

Preto de 110.000 persoas paradas

Segundo o SEPE, Galiza conta na actualidade con 109.691 persoas anotadas como demandantes de emprego, mentres que o número total de persoas afiliadas á Seguridade Social situouse en 1.111.206.

Fonte: SEPE

Fonte: SEPE

A caída da afiliación concentrouse en agosto fundamentalmente no sector servizos, aínda que tamén na industria manufactureira. O descenso afecta sobre todo a persoas con contratos indefinidos, sendo a modalidade de fixos-descontinuos a máis prexudicada.

O aumento da afiliación en ramas como a hostalaría, o comercio e as actividades sanitarias e de servizos sociais serviu para paliar, en parte, a forte caída rexistrada noutros ámbitos. O caso máis destacado é o da educación, que perdeu 1918 persoas afiliadas só no último mes.

Tamén se produciu un descenso significativo nas actividades administrativas e profesionais, así como na industria manufactureira, que se sitúan entre as ramas máis prexudicadas.

O retroceso na afiliación afectou principalmente ao réxime xeral e, dentro deste, ás persoas con contrato indefinido, sendo as fixas-descontinuas as que sufriron con máis intensidade a perda de emprego. Pola contra, os contratos temporais experimentaron un incremento.

Afiliación á SS segundo rama de actividade.

Fonte: SS

• afiliación
• datos paro
• paro