A CIG considera intolerábel que o conselleiro de Emprego, José González, continúe exercendo como máxima autoridade laboral de Galiza despois de que a Inspección de Traballo sancionase a adega da súa familia por empregar persoas migrantes sen papeis durante a vendima do pasado ano.
O secretario xeral, Paulo Carril, exixe que dimita ou sexa cesado e cuestiona que poida seguir exercendo a responsabilidade de velar polo cumprimento dos dereitos das persoas traballadoras, máis nun momento tan especial como o que vivimos e no que ten que ver coa dignidade das persoas migrantes.
A máxima autoridade laboral galega non está lexitimada para seguir exercendo esa responsabilidade
A CIG considera grave que, por enriba, González pretendese darlle normalidade a esta irregularidade e por iso advirte que “o tempo que tarde en dimitir, ou o tempo que tarde en ser cesado por quen o nomeou, fai culpábel o Goberno galego e a Rueda tamén”.
Carril lembra que este feito “dáse no contexto dunha adega vinculada cun conselleiro que ten responsabilidades e vén precedido tamén de actuacións do Tribunal Superior de Xustiza de Galicia en relación con obras ilegais”.
Por todo isto considera que “a máxima autoridade laboral galega non está lexitimada para seguir exercendo esa responsabilidade, porque foi incapaz de que funcionasen os mecanismos de defensa dos dereitos das persoas traballadoras”.