Xorxe Caldeiro, responsábel da Unión Local da Mariña, aínda tomando con cautela a resolución por canto pode ser recorrida, valora positivamente o sentido da mesma, polo que significa no recoñecemento dos dereitos destes traballadores e traballadoras “inxustamente despedidas”.

Caldeiro, que lamentou a demora do proceso porque chega catro anos despois de terse aplicado o ERE e cando o Grupo Sargadelos se atopa en concurso de acredores, subliñou que tan só a CIG apoiou a loita destes/as traballadores/as, aínda sendo minoritaria no Comité e de que o conxunto da representación do persoal rexeitaba os despedimentos. De feito, o resto das centrais sindicais non recorreron pola vía xudicial a decisión da administración de rexeitar os recursos de alzada presentados contra a autorización do expediente.

Cómpre lembrar que naquel momento a normativa vixente sobre despedimentos colectivos obriga ás empresas a contar coa autorización administrativa preceptiva para poder aplicar un ERE. De aí que a demanda vaia pola vía do contencioso-administrativo e non do social.

Dos 26 despedimentos que contemplaba o ERE, a empresa só chegou a efectivizar 8, “pero estes traballadores/as tiveron que loitar en solitario durante moito tempo, co único apoio da CIG, facendo mobilizacións diarias, e agora a xustiza dálles a razón, recoñecendo que houbo información insuficiente por parte da empresa e que a selección do persoal foi totalmente subxectiva”, apunta Caldeiro.

O responsábel da Unión Local da CIG subliñou que o texto da sentenza é moi crítico coa actuación da Dirección Xeral de Traballo, que non compartía o criterio defendido pola central sindical e os/as traballadores/as de que a factoría de Sargadelos en Cervo forma parte dun grupo empresarial, razón pola que a dirección tiña que achegar toda a información económica relativa a dito grupo.

A propia resolución chama a atención sobre o feito de que xa había sentenzas firmes nas que se determinaba a existencia deste Grupo empresarial, polo que considera “estraño” que administración galega non tivera constancia desta situación.

Outra das cuestións alegadas pola parte social e que o xulgado atende para anular o ERE, refírese ao número de despedimento e aos criterios utilizados para a selección dos traballadores e traballadoras incluídos no expediente. Neste punto, o xulgado dá outro “tirón de orellas” á Consellaría por restar importancia ao Informe da Inspección de Traballo, no que xa se alertaba do desproporcionado da medida.

Ademais, no informe da Inspección púñase en cuestión a información, a documentación e a xustificación do sistema utilizado para designar as persoas afectadas, polo que dende o xulgado se entende que só atendendo a este feito a Consellaría non debería ter admitido o ERE por non seguir criterios obxectivos de selección.

Queda comprobar agora que pasos dá a empresa, se recorre a sentenza ou non, e no caso de non facelo como procederá a efectivizar a reincoporación destes oito traballadores e traballadoras, ás que, ademais, terá que abonar os salarios deixados de percibir dende a rescisión dos seus contratos e o abonamento das contías correspondentes á Seguridade Social por este período.